Drank en Drinkers en die wat daarmee moet saamleef ...

Vandag se Briekmerk is 'n lelike een vir my maar ek glo vir 'n klomp ander mense ook. Herdie is nie net 'n Briekmerk nie, nee dis sommer a "doughnut" en 'n "burnout" daarby. Jy moes al sekerlik sulke wilde swartstrepe op die teerpad gesien het en dan wonder jy wat het daar gebeur ... een ding is verseker, iemand het daarna die lewe met ander oë bekyk.

WAARSKUWING: As jy drank gebruik en die grense van ordentlikheid gereeld oorsteek dan moet jy liewer nie verder lees nie. Hierdie Briekmerk is verseker nie 'n verheerliking van alkohol en sy gevolge nie ... nee, dis 'n brutale opsomming van sommige waarhede rondom die misbruik van alkohol en die uitwerking en gevolge vir die suiper se familie en vriende.

Ek moet eintlik nie die ding vandag skryf nie want ek is op DAG DRIE ... (Gaan lees maar hier wat dit beteken vir my) ... maar ek kan net eenvoudig nie langer uitstel nie want die ding van drank is 'n verwoester en baie mense dink dis speletjies.

Verseker is ek nie akademies gekwalifiseerd om 'n wetenskaplike referaat oor drank te skryf nie maar op hierdie punt dink ek geld die beginsel van "Qualified by Experience (QBE)" wel.

Voordat ek nou begin rowe afkrap en onderklere wys, laat ons net eers duidelikheid kry oor begrippe en beskrywings wat ek gaan noem.

Drinkers is mense wat alkohol gebruik. Nou kyk, ek is verseker nie 'n afskaffer nie en ek is ook nie een wat elke ou wat ietsie gebruik summier met die banvloek wil tref nie, so moenie dink ek is hier op een of ander eties gedrewe "mission" nie ... dis verseker nie waar nie.

Ek is 'n man wat groot waardering het vir die vrugte van die wingerd in al sy vorms en groottes. So ook die groot verskeidenheid van ander vrugte en plante se brouseltjies. My probleem is met diegene onder ons wat hulle vergryp en dan heeltemal sonder enige respek vir ander mense se gevoelens en emosies die wêreld om hulle in chaos dompel.

Drinkers ... vir my is dit mense wat alkohol gebruik. Geen onderskeiding op die gebruiks patroon nie en verseker nie noodwendig iets negatief daaraan gekoppel nie.

Drinkers kan in 'n paar hoofgroepe ingedeel word, sommiges heeltemal onskadelik en ander kwaai gevaarlik.

a. Sosiale drinkers ... hulle drink gewoonlik net by sosiale geleenthede. En die groep beslaan sekerlik 'n baie groot deel van die bevolking. Ons almal ken sulke mense, hemel, ons is seker almal deel van hierdie groep. As jy nie deel is van hierdie groep nie is jy seker 'n afskaffer en dit is vir my geen probleem nie of jy is op een of ander eties gedrewe missie. As dit laasgenoemde is dan gaan ek en jy verseker ook verskil in ons aanslag op baie ander dinge in die lewe.

Geestesgesonde en gebalanseerde sosiale drinkers ken hulle perke en weet waar om die streep te trek, as jy nie weet waar om die streep te trek nie is daar 'n goeie kans dat jy in die Suipers groep hoort en net die sosiale geleentheid misbruik om jouself aan die drank oor te gee. As jy 'n probleem met die benaming "Suiper" het dan kan net jyself dit verander.

b. Gewoonte drinkers ... hulle drink op tye wat hulle in hulle lewens bepaal het soos as hy of sy van die werk af kom of tydens etes ensovoorts. Geleenthede in sy eie lewe wat hyself bepaal en self skep. Die kan daaglikse tye, weeklikse tye wees of gedefinieerde gebeurtenisse. Meeste van die groep doen dit gewoonlik baie beheersd en binne perke en hulle is nie werklik afhanklik van drank nie want soms gaan daar lang tye verby dat hulle gladnie drink nie.

Ek het 'n oom gehad wat vir sy hele lewe lank elke aand voor hy gaan slaap het sy dop whiskey gedrink het, net daardie een en net voor hy in die bed klim. Op enige ander tyd het hy nie sterk drank gebruik nie.

Ek het ook 'n vriend wat elke middag oppad huistoe by sy geliefde drinkgat stop, een bier drink en dan gaan hy huistoe ... hy sê altyd dat daardie 30 minute die verkeer kans gee om tot bedaring te kom.

Ek het ook 'n goeie vriendin wat elke aand as sy by die huis kom 'n glas sjampanje drink terwyl sy kos maak. So is daar seker duisende mense wat in die gewoonte drinkers groep val en wat nooit hulle self vergryp of te buite gaan nie.

Maar ongelukkig is daar ook die wat weereens nie hulle perke ken nie en by elke geleentheid die dam onder die een uit suip en dan moet almal om hulle dit ontgeld.

c. Angs drinkers ... hierdie is 'n gevaarlike groep want hulle gryp die bottel net sodra dinge in hulle persoonlike spasie begin warm raak. 'n Argument met iemand of 'n spanningsvolle gebeurtenis soos slegte nuus. Hulle bedwelm hulleself juis op 'n tydstip wanneer mens by jou volle positiewe moet wees.

Hierdie is ook die groep wat gewoonlik erg agressief raak as hulle gedrink raak. Dis ook die groep waar jy die meeste kry wat dronkverdriet kry. Hierdie groep laat hulle naastes lelik les opsê as dit by emosionele foltering en soms self fisiese geweld kom.

d. Skelm drinkers ... hierdie groep is 'n ernstige probleemgroep want hulle drink so skelm dat hulle later aan hulleself ontken dat hulle enigsins drink. Die groep mense is die moeilikste om te hanteer en byna onmoontlik om te help want hulle leef permanent in 'n staat van ontkenning.

Hierdie is ook die groep waar persoonlikheidsveranderings gebeur as die persoon drink en dit is wat hulle verraai. Hulle is so seker dat niemand weet wat hulle doen nie dat hulle uiters agressief raak as iemand net sou waag om te vra of daar iets fout is. By so vraag gaan hulle feitlik onmiddelik oor na verdediging en ontkenning toe en begin almal om hulle beskuldig van een of ander wangedrag.

Meeste skelm drinkers weet diep binne in hulleself dat hulle 'n probleem het maar weier botweg om dit ooit te herken.

Suipers ... die is die groep drinkers wat nie hulle eie perke ken nie en kan in al die groepe hierbo val.

Dronklappe ... dis die groep suipers wat alle selfbeheersing verloor het. 'n Suiper kan 'n Dronklap word maar is nie noodwendig 'n Dronklap nie.

Hierdie is die groepe van drinkers wat ek sien en ken en gaan dit so gebruik in hierdie Briekmerk.

Net 'n tip of waarskuwing ... meeste drinkers hou niks daarvan as mens na hulle drinkery verwys nie, tewens, hulle raak sommer skuins bedonnerd as jy te requit na hulle verwys. So as jy 'n drinker is of 'n drank probleem het dan beter jy liewers eers nou 'n dop gaan steek en jouself kalm kry voor jy verder lees.

Ek skryf hierdie Briekmerk hoofsaaklik vir die slagoffers van drinkers se selfsugtige en banale optredes.

Drinkers dink selde daaraan wat hulle drinkery doen aan die mense om hule en daar is nogal 'n sterk ooreenkoms van die gedrag wat ek in my Briekmerk oor Selfsugtigheid geskryf het ... (Lees hom hier)

Ek kom uit 'n familie van drinkers en glo vir my, party van hulle kon drink ... harde drinkers wat baie keer ook suipers was maar in ons familie was daar selde 'n Dronklap ... nee jong, so persoon is uitgeskop uit die drinksirkel uit want hy was 'n verleentheid vir die ernstige drinkers. Klink miskien effens "weird" maar dis soos dit was ... my ooms en tannies kon hulle drank vat.

Ek glo nogal sterk daaraan dat drankvaardigheid in 'n mens se gene sit. My gene is goeie drank gene en volumes is nie iets waarvoor my gene skrik nie ... en presies daar het die probleem vir my begin. Vir my om dronk te raak was 'n duur storietjie. Natuurlik wil ek nie teveel feite uitlap nie want ek het darem nog lewende familie lede en hulle gaan die blixem in wees vir my as hulle hierdie goed lees en hulle kan hulleself te duidelik raaksien.

Op die 8ste November 1973 het ek dood in my spore gestop. Ons was 'n groep ouens wat so saam gekuier het en skaak gespeel het. Elke man bring sy koelkas saam want as jy wil ernstig drink moet jy nie op 'n ander man se rekening drink nie. My kassie het 6 Black Labels en 'n bottel Smirnoff ingekry ... elke aand en hy het altyd leeg huistoe gekom. Op die aand van die 7de was daar so ekstra baldadigheid in die samekoms want dit was die einde van die jaar vir ons as studente, so daar was so paar los bottels rum op die tafel ook. Wat verder gebeur het en hoe ons huistoe is gaan maar daar in Sunnyside bly lê.

Die oggend van die 8ste net na vyf is ek in LC de Villiers se swembad. Vyf lengtes en toe sit ek op die graswal met a Gunston in my hand ... die blou rokie krul in die oggendlug in en die son gooi sy eerste strale oor Pretoria. Net daar kry ek toe 'n boodskap ... ek noem dit maar 'n boodskap want ek weet nie wat anders om dit te noem nie ...

"As 'n mens so kan drink en dan die volgende oggend so kan swem, dan het jy verseker 'n erntige probleem."

Nou vir my was dit nogal skokkend om tot die besef te kom maar ook baie steurend. Terug by die koshuis sien ek my maters in die eetsaal maar hulle is verseker gebreek ... hulle babbeleer almal ernstig en drink swart koffie. Ek takel 'n stewige ontbyt van olierige bacon en eiers met toast en botter en konfyt en twee groot glase melk. Die tannies in die kombuis was tog te bly iemand wil eet.

Dit was maar stil om die tafel en hoe langer ek na my maters sit en kyk hoe harder maal daardie gedagte by my. Na ete is ek weg na my ouers toe op Wakkerstroom en daardie aand by die braaivleisvuur offer my pa my 'n bier.

"Nee dankie pa, ek drink nie meer nie."

Ek kon die skeptisisme in sy oë sien maar hy het net geglimlag. Die Sondag toe praat my pa weer met my oor die drinkery want Saterdag is ook verby sonder dat ek iets drink.

"As jy regtig ernstig is dan moet jy kom dat ons reël dat jy droogdokke toe gaan."

Nou kyk, droogdokke is 'n woord wat menige drinker met angs vervul. Soms raak hulle so angstig dat hulle sommer dadelik weer aan die drink gaan.

Ek het die aanbod van die hand gewys, nie omdat ek dit gevrees het nie maar my logika het dit duidelik vir my gemaak dat as ek nie self die drinkery kan stop nie dan gaan ek vir my hele lewe in vrees lewe. Daarvoor het ek nie kans gesien nie. Sonder om nou windgat te wil wees moet ek noem dat ek geseënd is met 'n besondere analitiese denkvermoë en dat as ek al die feite mooi uitgepak het in my kop en dan 'n besluit neem, dan is die besluit sonder emosie. My gesin beskuldig my baie daarvan dat ek 'n masjien is. Dis seker so maar dis nou eenmaal hoe ek is.

Vir 18 maande daarna het ek nie weer aan drank geraak nie en daarna het ek besluit dat ek net gaan drink wat vir my lekker is. So vandag, bykans 35 jaar later is dit nogsteeds so en ek drink minder in 'n jaar as wat ek in die ou dae in een aand gedrink het.

Wat egter 'n feit is, is dat in my are vloei die bloed van 'n alkoholis en dit sal nooit verander nie.

Ek is maar eintlik net 'n nie-praktiserende alkoholis.

Dis nie vir my 'n probleem nie, dis eerder 'n aansporing. 'n Aansporing om nooit toe te laat dat drank my beet kry nie ... ja ek sê toe te laat ... dis wat dit is, jy laat toe dat drank jou beet kry.

Daar is nog nooit êrens 'n geval gedokumenteer waar 'n brandewyn bottel van die rak afgespring het en homself leeggemaak het in iemand se keelgat af nie.

Nou dis my storie ... kom ons kom nou by die ander stories.

Die meer geleerdes praat van funksionele alkoholiste ... hierdie groep drinkers is donners gevaarlik vir hulle gesinne en die mense om hulle. Hulle dink gewoonlik, nee nie dink nie, hulle is positief dat hulle geen probleem met drank het nie. Intussen moet almal naby hulle gedurig met hulle staat van semi-besopenheid saamleef. Hulle boelie hulle naastes meesal verbaal en verder vervul hulle hulle afhanklikes gedurig met vrees want die afhanklikes weet dat as iets sou gebeur en hulle op die persoon sal moet staatmaak vir ondersteuning, gaan dit nie daar wees nie. As dit die pa is dan is die vrou en kinders uitgelewer aan hierdie marteling en as dit die ma is dan is dit die pa en die kinders wat spartel.

Hierdie soort drinkers maak my bedonnerd want hulle weier om te aanvaar dat hulle vrees en angs in hulle gesinne inbring en raak ook sommer hel aggresief as mens hulle sou probeer aanspreek.

Hierdie mense drink gewoonlik elke dag van hulle lewe.

Nou kom ek by die lelike groep ... "Binge Drinkers" ... Fuifdrinkers. Hierdie is ook die groep van drinkers wat die minste teenkanting van die sosiale gemeenskap kry en soms selfs amper 'n soort van helde verering kry. Hierdie groep drinkers drink nie elke dag nie en is dus nie regtig alkoholiste nie maar hulle het sulke spesiale tye wat hulle drink. Dis gewoonlik naweke. So van Vrydag middag af begin die drank vloei. Hierdie groep is ook gewoonlik die wat erg aggresief raak as hulle eers aan die suip is en alles en almal om hulle moet dit ontgeld.

Die ware riller is wanneer een eggenoot so drink en die ander een drink glad nie so nie. Meeste van hierdie Fuifdrinkers suip gewoonlik so dat hulle die volgende dag niks kan onthou van die stront wat hulle aangevang het terwyl hulle so besope was nie. Hierdie mense is ook die groep wat die minste bewus is van hulle perke. Hulle dink hulle is 100 persent in beheer ten alle tye.

Moenie met hulle probeer redeneer terwyl hulle gesuip is nie want dit kan tot lelike fisiese geweld lei of die anderkant, 'n smartlike sessie van dronkverdriet.

Probleem, Maandag oggend is die kalant nugter en die liefdevolste eggenoot. Dit is die mallemeule wat jou klaar maak. Maandag is jy te bang om oor die drinkery te praat want jy wil nie slapende honde wakker maak nie. So die Fuifdrinker kom weg met sy nonsens maar by Donderdag trek jou keel alweer toe want jy weet wat gaan nou weer Vrydag gebeur. En so suip die Fuifdrinker jou lewe ook weg ... een week op 'n keer.

Fuifdrinkers is ook gewoonlik drinkers wat uit-pass soos die Engelse sou sê. Hulle lei ook gewoonlik aan totale geheueverlies as dit by sy dronk kaskenades kom. So wat is my raad ... ek het nie regtig raad nie want ek is nou nie Dr Phil nie maar ek het vir jou 'n plan of twee ...

As jy 'n vrou is en jou man is 'n Fuifdrinker ... wag tot hy omval en blixem sy bene en arms vol knoppe met 'n Krieket kolf of een of ander goeie moermasjien. Hy gaan wakker word en nie 'n idee hê wat gebeur het nie en dan vertel jy hom van die stoep trappies, los matjie of iets dergliks. Glo my, hy sal nie stry nie want hy weet nie. Moet nou net nie soos Oscar maak en die bebloede moermasjien laat rondlê waar hy gesien gaan word nie.

Onthou net dat as jy hierdie pad kies dan moet jy dit elke keer doen totdat hy begin glo die drank maak blou kolle.

As jy 'n man is en jou vrou is 'n Fuifdrinker ... hou jou mond, pak jou tassie en gaan weg met die kinders. Laat sy maar alleen wakkerskrik met geen idee waar julle is nie. As jy dan Sondagaand terugkom, maak asof julle weggegaan het op haar advies en vertel haar hoe goeie voorstel dit was. Smokkel met haar kop, dis goeie medisyne.

Ek is nie 'n goeie raadgewer nie want ek het 'n ernstige weersin in suipers. Ek praat gladnie met 'n persoon wat gedrink is nie. Nie almal kan dit doen nie.

Die tragedie is dat suipers, en onthou, alle drinkers is nie suipers nie, suipers steel ons lewens, een suipsessie op 'n slag en as jy weer sien is jy by vyftig verby en al wat jy in jou dagboek het is smart, hartseer en terleurstelling.

As jy gelukkig is, drink die suiper hom of haar in "oblivion" in so tussen 40 en 50 en dan kan jy weer 'n kans op geluk kry. Pas net op want die geskiedenis het al baie bewys dat iemand wat 'n suiper vir 'n eggenoot gehad het sal weer so een soek vir die tweede keer.

Ongelukkig het ons 'n kultuur van drinkery en dis iets waarmee meeste kinders groot word. Baie min wil die gevare van drinkery insien en dis eers as 'n drinkery op 'n tragedie uitloop dat die drinker, as hy of sy dit oorleef het, besef wat hy doen.

Wat my erg moerig maak is dat as jy 'n eggenoot het wat drank misbruik dan is jy gedoem. Jy kan dit nie regtig waag om te drink nie want hulle sien dit as goedkeuring vir hulle wangedrag en suip dan eers met oorgawe want nou weet hulle dat jy nie 'n vinger kan wys nie en hulle is hel vinnig om dit uit te wys.

Die van julle wat tot hier gelees het is verseker nie onder 'n wanindruk nie en besef by nou dat ek 'n erge renons in mense het wat nie hulle perke ken nie.

'n Lelike geval om mee opgesaal te word is 'n Fuifdrinker wat nie sy drank kan vat nie ... o genade, een dop en hy of sy is moerland toe ... en dan begin die ellende want nou sit jy met 'n dronklap en die aand het nog nie eers begin nie.

Ek het eendag vir so Fuifdrinker wat ek baie goed ken gesê ...

"Jy moet eintlik nie eers na drank advertensies op die TV kyk nie want teen die tyd dat die advertensie klaar is, is jy al wankelrig."

Maar nouja, ek dink ek het my punt gemaak ... drank misbruikers is gevaarlik, selfsugtig en verdien geen simpatie nie. Hierdie moderne idee van dat alkoholisme is 'n siekte ... waar kom dit vandaan ?

My opinie ... dis uitgedink deur geleerdes wat self suipers is en wat na 'n manier gesoek het om die suipery aanvaarbaar te maak en om simpatie te wek vir die suipers. By my gaan hulle geen simpatie kry nie want ek weet hoe die ding werk. Ek het die ding in die oë gekyk en besluit ek wil niks verder met dit te doen hê nie.

Malaria is 'n siekte, griep is 'n siekte ... drankmisbruik is 'n keuse.

Moenie sagkens met suipers werk nie ... as hy of sy aantoon dat hy werklik wil loskom van die drank af is daar 'n plan ... kry daai inspuiting of plant daai kapsule onder jou vel in wat jou by die dood laat omdraai as jy net aan alhohol vat. En moenie na die nonsens verskoning luister van ...

"Ek kannie die pil vat nie want as ek per ongeluk ietsie inkry dan draai ek by die dood om."

Per ongeluk se gat man ... net soos 'n meisie nie per ongeluk op die paal beland of 'n ou per ongeluk herpes opdoen nie, kan jy nie per ongeluk alkohol inkry nie. Al hierdie ongelukke vereis 'n spesifieke daad van die persoon af.

'n Fuifdrinker wat ek geken het, het na so suipsessie in 'n ongeluk beland. Gelukkig was die ander party 'n 30 ton vragmotor. By aankoms by die hospitaal kon die dokters nie waag om iets aan die suiper te doen nie want hy sou die narkose nie oorleef in sy staat van beskonkenheid nie. Na 'n paar ure het hulle uiteindelik in die teater beland en daar het hulle gespook want die kalant se bloed wou nie stol nie.

Na 'n groot gesukkel is hy redelik gelap en geplak na die intensiewe sorg eenheid toe. Daar was dit 'n aardigheid om die dae daarna te sien hoe die man in sy semi-staat van beswyming deur die onttrekkings gaan en drie dae later toe raak al sy wonde septies. Die ou se lewer was net eenvoudig so gedaan dat hy nie sy werk kon doen nie.

Die man is na 'n helse lyding dood sonder dat hy ooit werklik weer by sy volle bewussyn kon kom nie. Die grootste tragedie was om sy vrou en hulle seuntjie van 5 jaar te sien in die hospitaal. Gebroke en verslae.

Wat my die meeste opval ... nee, eintlik ammuseer ... is die hoë vlakke van tolleransie wat ons samelewing vir suipers en hulle gedrag het. Dis werklik verstommend. Die suipers verkry simpatie in plaas van dat hulle met die banvloek getref word.

Ek ken 'n man ... noem hom sommer Paultjie ... hy is 140kg en net onder die 2 meter lank. 'n Blok spiere met 'n vriendelike gesig. Paultjie is self 'n man wat sy rug op drank gedraai het en ken die stories van suipers eerstehands. Hy is die hoof van sekuriteit by 'n gewilde watergat.

Paultjie redeneer nie met 'n gesuipte molesmaker nie ... sy woorde ...

"Hulle wil nie luister nie en hulle kannie voel nie ..." so met een goedgemikte klap van sy groot hand sit hy die suiper in droomland en boender hom in 'n vertrek in om sy roes af te slaap. Vinnig, suiwer en sonder baie drama.

Dis wyd bekend dat 'n persoon selde twee maal na mekaar sy perke oorskry in Paultjie se domain. Paultjie het so betekenisvolle kyk wat hy 'n potensieële molesmaker gee wat die meeste wat al deurgeloop het vinnig halt laat roep.

Nou ongelukkig is daar nie baie Paultjies in die wêreld nie.

So ten slotte ... as jy die perke van ordentlikheid oorskry ... gaan sit vir so paar oomblike doodstil en begin om jou kyk. Maak 'n opname van hoeveel mense beinvloed word deur jou gedrag en hoeveel mense is afhanklik van jou. Dan besluit jy maar vir jouself of dit wat jy doen regverdig is teenoor hulle. As jy enige inbors het is ek seker jy gaan jou optrede herdink. As jy nie inbors het nie ... gooi maar vir jou nog enetjie in.

As jy die slagoffer is van so suiper ... maak 'n plan en kom weg ... dinge sal nooit verander solank die persoon suip nie. Die vraag wat jy moet antwoord is of jy so wil leef vir die res van jou lewe.

Miskien as ons as gemeenskap minder simpatie met die suipers het sal hulle begin besef dat hulle self moet besluit om te verander.

Jy as gasheer by 'n geselligheid moet die moed aan die dag lê en sê ...

"Jy het nou genoeg gehad !" ... en doen dit sonder om te dink oor die mate van ongewildheid wat jy op die lyf kan loop maar dink eerder aan die waardering en stille bewondering wat jy gaan ontvang van die slagoffers.

Jy as eggenoot moet sê ...

"Ek is baie lief vir jou maar as jy drink gaan ek gladnie met jou praat nie."

Jy as ouer moet sê ...

"Jy is my kind en ek sal altyd vir jou omgee maar as jy wil suip is jy nie welkom in my huis nie."

Ja ek weet jy loop die risiko om op die kort termyn baie verwyte en verwerping te ervaar maar op die lang termyn is dit jy wat daarby gaan baat want die wat by jou wil wees omdat jy jy is gaan jou grense respekteer ... die wat nie ... wel dis ook beter so vir jou eie geestesgesondheid en geluk.

TEN SLOTTE:

As jy besef jy het 'n probleem met alkohol en jy wil iets daaraan doen ... gaan soek hulp by die AA ... en nee dis nie die AA vir karre nie ... die AA vir Alkoholiste.

Hoekom die AA ?

Wel in die eerste plek is is hulle almal gesoute mense wat bykans elke stront storie wat jy wil vertel al gehoor het en jy dus nie ligter gaan afkom nie.

Tweedens ... dis 'n groep mense wat hulle self bereidwillig verklaar het om suipers te help. Hoekom is nie belangrik nie ... al wat tel is dat hulle bereid is om dit te doen.

Moenie na alles wat jy alreeds aan jou familie en vriende gedoen het nou nog verder gaan en verwag dat hulle moet jou help nie. Eerstens is hulle nie regtig instaat om jou te help nie en tweeedens gaan jy hulle baie maklik omry met 'n sopstorie. So as jy ernstig is ... gaan na die AA toe.

Hier is vir jou die skakel ... http://www.aasouthafrica.org.za/ of KLIEK HIER ...

En nou is ek klaar ... hierdie Briekmerk neul aan my al vir 'n baie lang tyd en elke keer as ek dink nou gaan ek hom skryf dan dink ek weer aan die moontlike negatiewe gevolge en los dit maar liewer.

Laas week loop ek weer iemand raak en die persoon is bykans in trane ... daar is 'n ernstige drank probleem in die binnekring en die persoon is radeloos.

Net daar toe besluit ek ... die Briekmerk moet uit ... suipers kom weg met moord ... nou verseker nie met die soort ding wat die howe moet hanteer nie maar hulle kom weg met moord in die sin dat hulle die mense om hulle se geluk vermoor, hulle geesteswelstand vermoor en hulle in emosionele kettings bind. Hulle doen al die dinge en meer en word selde tot verantwoording geroep. Hulle kom weg omdat ons te ordentlik is.

Nou het ek die streep getrek ... besluit jy maar self waar jy staan en wat jy gaan doen.

Groetnis ... nou gaan ek braai ... ja ek gaan ietsie vat ... ietsie lig soos 'n botteltjie water.

Goeie maniere of wat ...

Vandag se briek merke lê soos die slymstrepe van 'n slakspoor oor my siel. Elkeen van ons het mos sy eie spesiale ou dingetjies waarvan jy hou of goetertjies wat belangrik is vir jou. Oor die wyd uiteenlopende persoonlike onaardighede van mense kan ons boeke vol skryf maar ek wil net op so paar van hulle fokus.

Die hele ding begin gewoonlik vir my sodra familie kom kuier. Nouja ek is in 'n sekere mate maar 'n eksentrieke ou blixem en ek het vasgestelde roetines wat baie belangrik is vir my. Weet jy wat ... dis nie eintlik roetines nie maar in werklikheid meer rituele. As enige van hulle versteur word dan raak ek skuins bedonderd en erg iesegrimmig.

Neem byvoorbeeld my opstaan dinge in die oggend. Eerstens is dit 'n doodskoot vir my siel as ek wakker geraas word ... nee jong, ek het nodig om stadig uit die koma uit te dryf en dan in byna volslae stilte stadig my lyf te laat aktiveer. Ek sit so vir a minuut of wat op die kant van die bed en wag dat my oë net gefokus kry. Dan trek ek 'n hemp ding aan en kies koers kombuis toe ... so langs die pad draai ek af by die badkamer, my badkamer ... hieroor later meer, en dan die kombuis. In volslae stilte staar ek deur die venster terwyl ek wag dat die water kook en dis met byna ergerlikheid wat ek kort kort na die ketel loer om te sien hoekom sloer die ding so. Hierdie eerste koffie is noodsaaklik want ek is 'n roker en in die oggend voel en proe dit mos of daar 'n slagpale in jou mond is.

Met volslae oorgawe vat ek die eerste slurp van die warm bruin voggies en spoel elke hoekie uit voor ek dit insluk. Die koffie het omtrent dieselfde effek op my sisteem as wat nitros op 'n engine het en ek stap doelgerig na my studeerkamer toe. Hier trek ek die blindings op en maak die venster oop. Die vars lug sit nog so bietjie woema in my lyf en ek steek my eerste skyf op ... met volslae bewondering kyk ek hoe die blou rookwalm krul en draai en koers kies ... nog 'n trek en my lyf is op volspoed. Nou is ek wakker. Nog 'n sigaret en dan die tweede koppie koffie. Nog 'n sigaret en dan is dit weer sulke tyd vir my ingewande ... nou is dit koers kies terug badkamer toe.

Wel na die hele ritueel is ek ordentlik wakker en reg vir die dag ... 'n dag wat gewoonlik so tussen sestien en agtien ure lank gaan wees. Teen hierdie tyd begin die mense in ons kantore oral oor oplog op MSN en kort voor lank is ek nekdiep in dit wat ek moet doen. Soms sal dit omtrent vyf ure wees voordat ek weer uit my stoel uit opstaan. Nouja dit is die hele rede hoekom ek ordentlik moet opstart in die oggend ... versteur een van die rituele en my dag is sommer dadelik omgekrap.

My dae bestaan hoofsaaklik net uit werk uit en terwille van my "sanity" het ek so paar spesifieke TV programme wat ek kyk en ek kyk dit omdat dit deel vorm van my oorkoepelende "stress mangement" regime. Soos wat die Grotman ook dan inderdaad verduidelik het ... ek kyk nie TV nie ... nee my maat ek WORD die TV. Ek wil nie 'n gepraat hê as ek kyk nie en as daar mense is wat gesels dan staan ek liewer op en gaan sit in my studeerkamer en hou my besig met dit wat ek moet doen. Ek haat dit om te probeer luister na 'n TV program met 'n geklets tussen in. Hierdie kletsers ... vir wat staan hulle nie op en gaan klets weg van die TV af nie. As ek gaste kry terwyl daar iets is wat ek wil kyk op die TV dan neem ek dit op en sit die TV af. Dan kuier ek met my gaste.

Maar nou as daar 'n ding is wat my moer lelik kan koer dan is dit die volgende scenario ... ek hou van 'n sekere program op a spesifieke tyd van die week en dit is so gemerk in my "mental" dagboek. Op die minuut staan ek op in my studeerkamer en gaan sit voor die TV, feitlik op die klok as my PVR oorskakel na my program toe. Lekker ... NEE ... nie lekker nie want nou reken 'n kuiergas mos dat hulle sou dan nou so bitter graag 'n spesifieke program wil kyk want hulle volg dit getrou vir die afgelope 19 jaar en kan eenvoudig dit net nie mis nie. Vir 'n moment voel ek hoe my bloeddruk styg en dan teem hulle weer ...

"ASSEBLIEF TOE ... vannaand gaan Jannie sekerlik wen en ek kan dit nie mis nie."

'n Streng opvoeding en 'n ma wat sosiale etiket in my ingemoer het laat my nou instinktief optree. Met so botox uitdrukking op my gesig skraap ek myself op van my stoel af, skakel die kanaal oor na die versoekte program toe en stap na my studeerkamer toe. My brein werk oortyd om die sisteem te herprogrameer en ek vang so blou skerm of twee. Na 'n lang trek aan 'n Camel voel ek hoe ek reboot. Stadig flits die icons verby en uiteindelik lê die desktop weer voor my. Dit neem my so paar minute om te reboot en dan gaan ek maar weer aan ... moerig maar ek gaan aan.

Wat is dit wat gaste laat aanvaar dat hulle wense die hoogste prioriteit moet dra ?

Die blote feit dat hulle gaste is ?

Wel ek dink nie so nie. As ek 'n gas is in iemand anders se huis dan maak ek baie seker dat ek nie die gasheer meer verontrief as wat nodig is nie. Ek eet wat opgedien word, drink wat aangebied word of sê baie beskaafd nee dankie. Ek maak die badkamer ordentlik aan die kant as ek daar in was en maak seker dat niks van my eiendom rondlê nie. Alles dinge wat my ma in my ingedril het van baie klein af.

Kom ons stap nou so bietjie terug op die pad ... die badkamer. Jissim, ek is a helse puntenerige mens as dit by badkamers kom en dit is ook iets wat my ma in my ingedril, ingepreek en ingewetter het. Dit is so deel van my dat ek en my vrou gladnie dieselfde badkamer deel nie. Kyk laat ek dit net dadelik duidelik stel ... dis nou nie dat sy slordig in die badkamer is nie maar ek en haar idee van hoe 'n badkamer moet werk verskil. In die begin het ek geskimp, later verduidelik, toe baklei en toe een geoie oggend toe ek weer die tandepaste oop op die wasbak se rand sien lê toe besluit ek ... hier is ek uit of my siel gaan hel toe. Sonder seremonie het ek my ses toilet items tussen die twaalfduisend sewe honderd en veertien botteltjies, borseltjies en buisies uitgepik en getrek na die gaste badkamer toe. Dit was vyftien jaar gelede en ek het vrede in my siel en sy is gelukkig in haar badkamer.

Nouja die skuif het my siel gered maar nou kom die stront as ons kuiergaste kry en hulle moet meer as een kamer gebruik. Dan word my badkamer mos nou natuurlik nie meer my badkamer nie en ek voel soos 'n skoot hondjie wat langs die pad afgelaai word en die eienaars ry weg. My hele sisteem is nou in sy moer in. Ek staan op en kies koers kombuis toe ... heeltemal op auto pilot ... en as ek links wil afdraai dan verstar my gesig ... die deur is toe ... net betyds onthou ek die gaste en maak a blitsvinnige u-turn want nou moet ek blitsig ander plek gaan soek. Daar breek die eerste speek in die wiel.

Na die ompad en alternatiewe rusplekkie vat ek weer die pad kombuis toe ... my brein is franties besig om te re-route en dinge is meesal baie vaag om my. O hel ... tweede speek in sy glorie in as ek om die hoek van die gang kom ... die mense in die kombuis staar na my asof ek 'n spook is ... wel waarheid is dat ek seker 'n "sight for sore eyes" is ... ongeskeer, hare windskeef geslaap, slaapbroek en 'n hemp wat net so een of twee knope vas het.

Weer gooi ek brieke uit en u-turn terug kamer toe. By hierdie tyd is omtrent alles in my in chaos en met gedempte swetse klap ek die kamerdeur agter my toe en ek staan vir 'n oomblik en probeer re-boot.

"Fokkit !"

Ek gaan in my vrou se badkamer in, was my gesig en kam my hare en gaan trek my ordentlik aan. Dit vat so tien minute. Intussen het sy darem besef dat die ou ballie nou nie so lekker is nie en terwyl ek my belt vastrek loer sy by 'n skrefie van die deur in.

"Jou koffie is op jou lessenaar."

Dis al en sy verdwyn terug kombuis toe deeglik bewus van die feit dat "knormoer" nou die enigste benaming is vir my. My dilemma is nou dat ek moet nou by daai deur uit en vriendelik mense groet en vol smiles wees ... dêmit ... ek is verseker nie 'n oggend mens nie.

My dag is nou in sy moer in en ek weet ook uit ondervinding dat daar kort kort iemand in my studeerkamer gaan inloop en lospraatjies kom maak. Hulle gaan aan die goeters op my lessenaar en in my boekrakke vat en vroetel en hulle vingers orals indruk en met my goeterjies peuter. My hele opstart roetine is omvergewerp en ek is knorrig.

Wel ek skryf die dinge vannaand want dis tog so maklik om dit anders te laat verloop ... net so bietjie respek, so bietjie konsiderasie en dinge kan beide kante toe bietjie swenk en almal kan oor die weg kom.

Ek is my ma ewig dankbaar dat sy my goeie maniere geleer het. Sy het my die waarde van respek geleer en sy het seker gemaak ek is toegerus vir 'n lewe van ko-habitasie.

Blêddie jammer almal het nie so ma gehad nie.

Ek is seker elkeen wat hier lees sal met een of meer van die dinge kan indentifiseer. Lag oor dit wat snaaks is en frons oor dit wat jou ongemaklik laat voel maar moenie die waarde van goeie manier ooit onderskat nie. Goeie maniere sluit gewoonlik respek in en respek maak dat ons onselfsugtig optree.

Ek gee my TV program prys en dit sonder a geveg ... of 'n dankie ... dit sou mos beter gewees het as die gas die volgende gedoen het.

"Jong ek kyk graag na dit of dat op kanaal so of so op 'n Vrydagaand. Ek sien jy kyk dit nie. Kan jy dit miskien vir my opneem op jou PVR en dan kan ek dit bietjie later kyk."

Hoe op dees aarde kan ek so versoek weier ... kanse is goed dat ek self sal aanbied om my program op te neem en later te kyk. Maar nee die GAS is mos koning en moet sy sin kry.

Die badkamer ding kan ook beter hanteer word maar my sisteem kry sommer a "tank-slapper" as ek my tandepaste op die wasbak sien lê en my badkamer kassie se deur staan oop. Die goeters is dinge wat met respek behandel moet word.

Ek het 'n vriend wat so wan en dan hier by ons oorslaap as hy in die Laeveld werk. Hy is altyd bedagsaam en werklik 'n plesier om aan huis te hê. In die oggend staan hy vroeg op en sonder gedruis of gedreun gaan maak hy vir hom koffie en sit in my lapa of op my stoep of by my koi-damme en gee my tyd om wakker te word. Ek dink hy het ook so ma soos myne gehad.

Ek gaan nou nie verder karring nie ... dink maar aan die storie en probeer dink hoe maklik dit is om dinge anders te doen.

******************************************************************


Kommentaar wat oorspronlik op Bike in jou Taal gepos is  ... dis waar die Briekmerk oorspronklik eerste gepubliseer was.

Christa:
Ai Colyn, ek voel saam met jou, ek is mal oor kuier, maar moenie in my privaat spasietjie kom aanjaag nie. Ek belowe jou dan is ek sommer vinnig opgeruk. Ek het oor die algemeen 'n ding met badkamers. Maak nie saak waar ons kuier of stop vir 'n "body-break" nie. As die badkamer nie vir my skoon lyk nie, sal ek knyp en knyp tot ek by 'n skoon badkamer uitkom. As ons gaan kamp, wil ek eerste weet hoe die badkamers lyk. Die res is 'n bysaak, maar die badkamers moet ordentlik wees. Ai ons en ons dingetjies, of eerder, ons en ons opvoeding. Maar ek is nie 'n dag spyt oor my opvoeding nie. Lief my ouers baie.

Strawbs:
Shame Colyn.....ek voel vir jou!!!
Met kuier gaste is ons maar altyd uitgesit...maar hopelik is dit nooit vir te lank nie...
n mens is maar n mens en ons het almal maar ons dingetjies....(rituele soos jy gese het) en hopelik respekteer ander dit!
Sterkte vir jou!!!

Mudbugger:
Hier by ons vreet die muskiete jou in die somer op en suip jou uit ...
en die familie in die winter.

Cassie:
Colyn, dankie vir jou storie....... ek is PRESIES, PRESIES, PRESIES soos jy!!!!!!!!!

(Behalwe dat ek nie rook nie.........)

Maar my rituele, gewoontes, maniere, etc is ook baie belangrik vir my. En sodra iemand dit kom indring of opneuk, is my Aries humeur op sy ergste!!!!  Azn

Dan is ek nog 'n perfeksionis ook! Ek's jammer, maar ek kan nie en sal NOOIT laid back wees nie!!!!

Daar is geen 'grys areas' in my lewe of doen en late nie......... dis of reg of weg!

Gofast:
Ek stem veral saam met die TV ding. As gaste in my huis inkom en wil kyk wat hulle kyk maak dit my kook, maar ek laat dit maar toe, want ek het ook so ma. As ek in iemand se huis bly, dan kyk ek net TV wanneer hulle kyk, en ek kyk wat hulle kyk. Dis mos nie my TV nie!

Ek se so: As jy in iemand se huis bly as 'n gas, val jy in by hulle roetines/rituele. Ek slaap nooit laat as ek by iemand bly nie. My ma het my geleer dit is swak maniere. Ek eet wat hulle vir my gee sonder om te kla. Ek stort eers wanneer die mense wie se huis dit is almal klaar is. Ek vra eers voor ek iets uit die yskas kry. En nooit, NOOIT maak ek hulle huis deurmekaar nie. Ek maak agter my skoon!

Dis maar hoe ek groot gemaak is, en ek dink dit is die regte manier.

Lynnie:
Ja nee kyk Colyn - ek stem 1000% met jou saam.  Ek is seker dat my familie my as 'n heks beskou met dinge in ons huis - maar as ek nie op sekere dinge aandring nie sal alles 'n totale gemors wees.  Afgesien van goeie maniere, ordentlikheid, bedagsaamhied, netjies- en skoonheid - hoekom kan van ons die regkry en regdoen - en die meederheid dit nooit toepas nie.

My groot wapen-woord in my huis is BEDAGSAAMHEID.  En dit geld nie net vir my familie nie - maar vir my vriende/vriendinne en gaste/kuiermense.  Omdat ons vreeslike sosiale mense is - en baie keer weggaan met groepe mense - en baie gaste by ons kom aanbly - maak ek altyd op 'n baie mooi manier seker dat mense die huisreels ken waar ons ookal gaan - en my kinders moet ook seker maak dat hulle ons huisreels met hulle vriende deel.
As jy my kinders moet vra wat ons huisreels is kan hulle 'n hele streep opnoem - dit is nie nodig om dit aan deure/mure te vertoon nie - hulle moet dit ken - en dit toepas waar hulle ookal gaan.  Huisreels, wat met almal gedeel word, verhoed baie onnodige en onplesierige situasies.

Maar aai, oor die algemeen pak mense hulle onbedagsaamheid saam in hulle vakansie/weggaan tassies en pak dit uit en gebruik dit in jou huis. Wanneer dit gebeur, maak ek seker dat ek in volle beheer is met my emosies - en ek deel met die situasie of 'n baie kalm en mooi manier

Ja kyk, ek glo dat ons almal al hierdie situasies beleef het - of sal nog ook. Poefies gebeur - dit is maar deel van die lewe. Maar hoe ons dit hanteer is ook veel meer belangriker.

Nou sal jy ook kan verstaan waar my "fairy fantasy" vandaan kom.  Almal wat my goed ken weet ek is die "wishful fairy" want elke keer as huisreels bespreek word is my algemene gesegde :  Daar is geen "fairies" wat in my huis woon nie - so moenie dink dat 'n "fairy" hier 'n draai kom maak met haar "magic wand" nie.  Dit is hoekom ek van "fairy" dinge hou - miskien as ek "fairy" goedjies rond dra sal ek hulle eendag ontmoet met hulle "magic wands"

WWD:
Jip, ek voel dieselfde!!  Ek is nie lief vir gaste nie, al is dit familie.  Die vriende ding het ek ook al beleef, en besluit dis nie vir my nie.  In elkgeval, ek het my kids, hulle is my familie en vriende, dis al wat ek nodig het, en 'n mens is meer geneig om buigsamer met hulle te wees, maat 'n tandepaste proppie wat nie opgedraai is na gebruik nie, dit kan nogal wild krap, dan het ek sommer sand tussen my tanne vir die res van die dag!!
Maar nou ja, ek bepaal die uitloop van my eie dag.  Ek kan loop en sand kou of sug en die proppie opsit, bietjie wag dat die ergste ontsteltenis bedaar en met 'n sagte houding vra om nie die proppie te vergeet nie.  Alles uitgesort ...... vir drie weke ... en wat wag dan vir my .... die proppie!!  Dan is ek nou maar bevrees, hulle krap my met 'n eierspaan van die mure af .... DAN is dit uitgesort!!
Maak nie saak watter kant to nie, jy bepaal maar jou eie dag, vat hom ma soos hy kom en ry hom uit.  Swim with the wave, don't fight it ... you'll drown